أوّل جمعيّة للمثليين في تونس و الطحين المقدَّس

هيّا السلام انشاء الله أوموركم تكون في الجبن

المقالة الإخّرة اللي كتبناها علي السويدي خير من التونسي ما نالتش استحسان برشا عباد و هذا نضرا لعدّة أسباب !!! فمّا شكون حسّ روحو مستهدف و حسّني نحكي عليه بالرغم ما جبدت حتّي اسم و هنا نقول المجراب تهمزو مرافقو ... و فمّا اللي مشا يجري يسبّ فيّا و يقول اللي انا ما عندي حتّي علاقة بالعمل الجمعيّاتي و ما عندي حتّي علاقة بالتشش و هذا عادي لأنّو هذا هوّ الطحين المقدَّس ... و هاذوما عباد نيّاكة يبيعو بوهم علي مصلحتهم و عايشين بالطحين و للطحين و ما عندهم وين يوصلو و آخرهم خرجة للمغرب و الا لهولاندا يقعدو يحكيو عليها حياتهم الكلّ تقول تولدو غادي

ما علينا من بعابص الكبار اللي باش يعيشو طول عمرهم طحّانة و خلّينا نحكيو علي أوّل جمعيّة للدفاع عن حقوق المثليّن في تونس

نرجع لنفس التقسيم متاع 2006  قبل هالتاريخ النضال ضدّ الهوموفوبيا كان فردي أو شخصي ... محامي يخرج للبنان يعمل تقرير علي فصل العار و الا يتلمّو فلوس بين الكراكة و التشش الصحاح باش يعاونو تشتوشة و الا يهزّواها قفّة في الحبس و الا .. و لحق ما أحلاهم هاك الأيّامات وقتلّي كنّا كعبتين و كعبة و كلّنا يدّ وحدة  و برشا لمّات و قعدات متاع الزمن الجميل يا إمّا في البساج و الا في المرسا و الا قربة ... أيّامات حلوة عديناها و يمكن كنت انا أكبر واحد في المجموعة أما كيما يقولو ناس قبل الكبير ربّي و تعدا هالمدّ التضامني و هالمحبة كيما تتعدّي الصنعة من العرف للصانع و برشا وليدات ماللي كانو معانا كمّلو الثنية و برشا منهم اللي خذاتو الدنيا و اللي عرّس 

صحيح كنّا شويّة اما كنّا يد وحدة و محلانا

و من 2006 بداو يتنضمو في مجموعات ... و كيما قال ابن خلدون اتُّفق العرب علي ان لا يتفقو 

لحق مالأوّل تحسّ اللي فمّا هاك اللحمة مازالت و بداو يكسّرولنا في البطاطة تبدي قاعد في بانوراما لاباس عليك عامل جوّ يفضحوك هاو بريزرفاتيف هاو ليبريفيون هاو درا شنيّة قدّام الناس لكن خدمو خدمة هايلة و عاونو برشا تشتوشات تحكم عليهم و جابو مرّة و الا ثنين محامي باش يدافع عاللي توقَفو بمقتضي فصل العار و لتوّا هاكم تشوفو ما جبدنا كلمة جمعيّة ... هي صحيح فكرة جمعيّة لاهية بالتشش في تونس و تكون تشبّه لجمعية حلم اللبنانية كانت حلم برشا تشش توانسة و قعدنا هكاكة لين جات الثورة ... و كان تحبّو نفكّركم بالثورة و خاصة يوم 14 جانفي اللي كان أوّل ڤاي برايد في تونس ... التزغريط و الدرابو العزيز الغالي و التبزنيس و الشيّ و الكذا

جات الثورة و قلنا كهوّ توّا وقتو و ماعادش فيها و بداو برشا عباد يتلمّو باش يكوّنو أوّل جمعيّة للتشش في تونس و اللي هيّ الموروث متاع سنين خدمة 

و تعملت الجمعية و عدت فرحا مسرورا و هاك الجوّ بكلّو 

و الجمعية هذي مازالت قائمة الذات لتوّا و مقرّها في الأوراق في تونس اما في ارض الواقع في سوسة 

نرجع بيكم شويّة لتالي و بعد ما تكونت الجمعية و كيما قلت بكري اتُّفق التشش ان لا يتفقو  استنّاو أوّل أزمة تافهة في هالجمعّة و تفرڤعت الجمعية لتلاثة جمعيّات ... و مصيرهم نهار من النهارات باش يرجعو مع بعضهم 

ما علينا قلنا بدينا بجمعية ولّاو تلاثة و التلاثة هاذوكم زادو تقسمو ... منهم اللي تحب جمعيتها متاع لزبيانات برك و كثر التخلويض 

و كيما تقول أحلام لا يصحّ الا الصحيح قعدو زوز جمعيات برك موجودين منهم الجمعية الأمّ و اللي نحيّي رئيسها اللي هوّ ولد بلادي و نحبّو برشا و نقلّو ربّي يعينك في البرد

و جمعيّة اخري زادة فيها برشا عباد قدم يخدمو

المهمّ في الْمُدَّة الأخيرة تزادو 4 جمعيات فرد ضربة و الغريبة في الأمر انهم الأربعة طول قالو اللي هوما جمعيات باش تدافع علي حقوق المثليين صحيح نحيّي فيهم شجاعتهم اما هذا اسمو قحب و تمعّش مالقضية و كثرو عشاواتهم و قعداتهم في السفارات

و انا كتشتوشة عتيقة ما يساعدنيش تدافع عليّا جمعيّة متبنيها بيدوفيل و لا داعي لذكر الأسامي و ماناش ناقصين لخبطة بين مثلي و بيدوفيل

نرجع لمقالة لبارح نتمني اللي الجمعيتين اللي هوما الموروث الشرعي و الوحيد للنضال ضدّ الهوموفوبيا يفكّو بلاصتهم و يكتبو و يوثّقو و نستنا منهم شكر خاطرني نخدملهم في خدمتهم و نستنّي ملاحظاتهم باش نحسنو مستوي الصفحة و نطلب من الجمعيات الجديدة باش يقولو باللي تخدم قبل و يطلبو خبرات الناس هاذم و ما يسرقوش خدمة سنين و خاصة ما يهدوهاش 

و نشكر العباد الموجودين داخل الصفحات اللي يمدّونا بالتعليقات اللي تصير في الخفاء و نشكرهم علي دورهم الكبير اللي هوّ موش تجسس لكن لمصلحة الصفحة و التشش بصفة عامة و شكرًا 

و للحديث بقية

انضمو إلينا على فيسبوك 

https://www.facebook.com/lgbttunisiens