جمهورية تشي.تشيلندا العضمى

   هيّا قلنا السلام يا معشر التشش ... شنيّة ؟   ماعجبتكمش الكلمة ؟؟ عادي امسحوها فيا  و خليّنا نحكيو شويّة علي دولة تشيتشيلندا العضمى .. شنيّة ما تعرفوهاش زادة ؟؟ هوّ صحيح نعرف اللى هيّا ميش موجودة لحدّ الآن .. أما شكون يعرف آش ينجّم يصير  من بعد ... أما نتصوّر حتّي كان ما تعرفوهاش أكيد كلّ واحد منّا جاه نهار وتخيّلها في مخّو قبل ما يرقد ... بحر و شمس و زبابر و بلاد كاملة ما فيها حتّي حدّ يسبّك و الا يتشوحرلك و الا يقلّك هاك الكلمة المنيكة اللي الكل سمعناها ... أما باش تكون بلاد كلّها تقلقيل ههههه ... كلّنا تخيّلنا هالجنّة .. أما زعمة ينجّم يجي نهار و هالحلمة تولّي حقيقة ؟؟

هيّا نفرّكو هالرمّانة مع بعضنا .. قبل كلّ شيّ و كي العادة نفكّرو العباد بشويّة مصطلحات : دولة، بلد، أُمَّة 

البلد :  منطقة جغرافية.

الأمة : ناس تجمعهم اعتبارات مشتركة اصول وتاريخ.

الدولة تشير إلى مجموعة من مؤسسات الحكم ذات سياده على أرض وسكان محددة

هايل برشا ! مالا نبشّركم يا سادة يا مادة و للي ما يعرفش اللي أحنا أُمَّة ... ايّ ايّ أُمَّة 

باش تقولولي كيفاش؟ ساهلة برشة .. قلنا اللي الأمّة هي أفراد تجمعهم قواسم مشتركة كيما تاريخهم و أصولهم و ... هانا باش نشوفو قدّاش من حاجة تجمعنا !

نبداو بحاجة هامّة باش يتقال علينا أُمَّة و اللي هيّا التاريخ .. واللي هيّا حاجة ضاهرة و ميش مستحقّة باش نفكّركم بيها ... الناس الكلّ تعرف اللي أحنا موجودين من أوّل الدنيا و الدلائل برشا في اللوحات الفنيّة القديمة و القصص و ال.. وال... و حتّي في الكتب السماويَّة 

نجيو لحاجة أخري تجمعنا و هيّ المعانات المشتركة و الوصم و التمييز اللي تعرّضنالو من أوّل الدنيا و منغير ما نحمّملكم قلوبكم نقول في كلمة وحدة صار فينا المسخ ... و زادة من الحاجات المشتركة هيّا اللي نسمّيها انا حركات التحرير اللي صارت في برشا بلايص كيما هولاندا و النمسا و سويسرا و كندا و أمريكا و .. و .. و خاصة العاقبة لينا و الي  التشش بعدها تحرّرو و خذاو ولو جزئيا حقوقهم

و زادة برشا قواسم مشتركة اخري الحقّ ماعنديش الجهيّد باش نقعد نسمّي فيهم الكلّ

أُمَّة و الا موش أُمَّة يا متعلّمين يا بتوع المدارس !!؟؟ 

و حاجة أخري أحنا موجودين في كلّ بلاصة ... تلقى المحامى و المهندس و البناي و الحجام و النجار و الوزير ... وين تدور تلقانا  !

 ايّ هانا أُمَّة و انّجموا نعملو كلّ شيّ و موجودين في كل المراكز آش ناقصنا باش نعملو دولتنا وحدنا ؟ الأرض ؟ أما قبل ما نحكيو عالأرض نحبّ نسألكم شويّة أسئلة 

زعمة كي نعملو هالدولة باش تكون برّسمى جنّة ؟؟؟

و اللي عملو دول وحدهم كيما الدواعش و الصهاينة خير منّا ؟؟

زعمة كي  نعملو هالدولة ماناش قاعدين نعزلو و نوصمو في رواحنا ؟؟

أحنا ناقصين أعداء و نزيدو؟ 

تعرفوش كيفاش ... هانا أُمَّة توّا ... و للحديث بقيّة 

نحبّ نشكر برشا صديقنا عبدو عالتصاور .

انضمو إلينا على فيسبوك 

https://www.facebook.com/lgbttunisiens