مراجل ... مسرحيّة تكسر حاجز الصمت عن المثلية الجنسية في تونس

عسلامة يا جماعة!!! كيف إنكم ؟؟ نشالله تكونوا في خيار الخير فرحانين ومتهننين متبيعين النصائح الي قاعدين نهبطوا فيها على موقعنا العزيز. حبيت نعتذر على الانقطاع لظروف مهنية والله لا يعاودو علينا. ايا يا سادة يا مادة يدلنا ويدلكم لطريق السعادة باش نحكيلكم ليوم على رواية ريتها في التياترو والله لآني عارف كان انا فرحان والا حزين بها العمل. انا تفرجت في مسرحية مراجل معناها المر الراجل وهي اقتباس من روايا فرانساوية تخدمت عام 1978 اسمهاla cage au folles

الأبطال متاع مراجل فنانين تونسا فما الصاعدين فما الهابطين وفما الي يتسماو في fin de carrière . ايا فما هيثم الحضيري فنان يهبل مطرب بأتم معنى الكلمة ويتقن الأوبرا متحصل على جائزة مفاتيح باريس الذهبية وممثل مسرحي  بارع. وفما محمد الداهش الي انا نعتبر من افرازات الثورة المكبوبة ونشوفو شخص ساذج بعيد عن التمثيل بعد عطارد  على زحل

 .

وفما طفلة الحق يقال هي موش دونية اسمها عيشة بن عطية اك الي مثلت خطيبة الشكلوا في نجوم الليل هي في طور النمو اما يلزمها برشا خدمة باش تولي ممثلة.

وفما زادة فرخ أسمو محمد أمين السماعلي هذا ينجم يجي ستار متاع بورنو ينجم يجي حوتة في اكواريوم ينجم جرانة في سبخة يجي رادادة وراء الهادي حبوبة اما مينجمش يكون ممثل مسرحي كيف يبدى على الركح وتتفكر الي الركح هذاكا لعب فوقو بن عياد والقصباوي وسي التيجاني بن حمدة (المرشال عمار) وسيدي علي مات فوقو تبدى تتندب وتهبط فيهم حيار وقد ما انت تندب تغرد. الطفل هذا حطوه في دور علاء الدين في مسرحية علاء الدين والمصباح السحري المصباح السحري وهو محطوط فوق طارمة وحدو يمثل خير منو. ودورو في مسرحية مراجل حدث ولا حرج تعرفوه برنامج لاحظات قبل الكارثة هذا لحظات قبل الكارثة والكارثة بيدها و50 سنا بعد الكارثة.

وفما زادة طفلة حلوة وهذي باش تكون من فنانات المستقبل وهي بنت الفنان القدير عبد العزيز المحرزي الطفلة الي خذات دور دعت في مسلسل الزوجة الخامسة.

والغلبة والطامة والمصيبة الي طيحت عليهم الكل والي قد ماريت مانشوفش كيفها لين نموت نحكي بللطبيعة على آزر الزوالي بالحق قداش الفن والا زوالي. السيد هذا قدم في راديو بودورو ما سمعوا حد. مد وجهوا عند علا الشابي الريدو عمرو ماتحل عمل دور في مسلسل متاع رمضان مات البراهمي وماتوا الجنود وعملوا 6 ايام حداد.  مثل في نسيبتي العزيزة نسبة المشاهدة طاحت. واتخيلوا الباقي ...

وانا نقول لأزر كيما قال الفاجومي (احمد فؤاد نجم) لام كلثوم : يا ولية عيب اختشي يا شبه أيد الهون دانت الي زيك مشي يا مرضعة قلاقون.

عيب الي تعمل فيه كارك خدام حزام على شركة مناولة

وفما زادة في مسرحية مراجل زوز فنانين قديرين مايختلفوش عليهم زوز هما سي محمد كوكة والسيدة شادية عزوز

سامحوني مانجمش نحكي على المسرحية ماكم تعرفوا ريق حقوق النشر اما ننصحكم باش تمشيوا تتفرجوا عليها وانا متأكد الي برشا باش تفرحهم كيما متأكد الي برشا ناس باش تغششاشهم والي يحب يعرف قصتها قبل ما بشوفها فالمسرح يكتب على Youtube la cage au folles.

انضمو إلينا على فيسبوك 

https://www.facebook.com/lgbttunisiens