تشتوشة الستوت

مرحباً بكم في الموقع متاعنا ومرحبا بكل واحد قرا مقالاتي ورحب بالفكرة ومرحبا زادة بالي ماعجبوش المنهج التحريري متاعنا وماذابينا كان تفيدونا بشوية انتقادات هككة نصلحو رواحنا. أيا يا سادة يا مادة يدلنا ويدلكم لطريق السعادة حديثنا ترتيب حسين عجيب صلاتنا وصلاتكم على نبيء الحبيب؛ على عزوزة الستوت، لايرحمها نهار، تموت دخلت من باب المدينة قالت: ما اضيقك يا ملك الله علينا!!! دخلت من عين الإبرة المثنية قالت: مااوسعك يا ملك الله علينا!! عميا طرازة الكتان، طرشة جلابة الخبر منين صار وكان، جرادة زحافت الحيطان... وكيما فما عزوزة الستوت في العالم الاخر فما عزوزة الستوت فالعالم المثني يعني ألك التشة الى تشبك تفتن تقلقل وين فما غلبة اعرفوا الي عندها يد فيها سو من قريب والا من بعيد هذي تخلقت باش تكون شريرة مشومة قرومة وكان يقولولها في الدنيا اخرى اش تكون ؟ تقوللهم كيما انا والا اقوى. وحياتها معبيا بالحكايات وعندها اخبار وتوارخ التشش الكل وديما خايضة والتشش يبداو يتهربو منها ومن مشاكلها. هذي تلقاها من 9 في الحبيب بورقيبة لل23 h يعني تحلو وتسكرو وفالحالة هذي مايفوتها شيء تعدي نهارها من قهوة القهوة وهي تحكي في الفلانة قالت في فلانة عملت في في تمشي لابلاصة اخرى تعرضها فلانة تحكيلها اش حكاتلها الفلانة اي عرضتها قبل بالربع ساعة والفلانة وصاتها وأكدت عليها بش ما تحكي لحد بالإمارة قاتلها: بينتنا !!!!!

ونوع هذا متاع التشش خطير خاترو يعمل المشاكل ويخلق الفتن وكيما تعرفوا الفتنة أشد من القتل. اما باش نفهموا النوع هذا من التشش يلزمنا نعرفو في انا بيئة ترباو وفي أنا ايطار عاشوا: انا عرفت برشة من هانوع وقد ما كنت شادد قدري طالني الطش وما سلمتش من شرهم التشش هاذم 90% منهم تولد وعاش وكبر في حي شعبي ويكونوا في عائلة تفقد الموازين العائلة  المتوازنة تلقاها الام عندها ديما مشاكل مع حماتها ولوزتها وسلفتها وجارتها وحتى كان جاتها كنة والا نسيب تواصل فالمشاكل مع الجيل الجديد والبو تلاقاه يا متوفي يا فالحبس يا يعيش البرة يعني مافماش سلطة أبوية وكانوا موجود تلقاه نكرة. عاد قلنا التشش يعيشوا في مجتمع أنثوي منحط وغالبا أصحابنا هاذم ما يكملوا قرايتهم وباش يعيشوا يتعلموا صنايع نساء كالحجامة والماكياج والطبخ العروبي ماتاع الأفراح والفروقات. اما هذا ما يعنيش الي مشوارهم يبدا كيما اي تشة سوى اغتصاب سوى ولد العم سوى ولد حومة كبير. والتشش هاذم يفهموا في كل شيء كان واحد عندو الجاير يقولوا عليك بالجبن يغلف المعدة، وكان واحد كرشو تجري يقولوا عليك بالنشا يوقف جريان الجوف وكان واحد يتثاوب يقللوا راك منفوس شوف شكون يكركب عليك يعني يفهموا فالطب اكثر مالطبة بخلاف الوصفات العجيبة متاع النفة في الصرة وتكبيس الرأس بالثوم والبن وزيت القضوم. ويعرفوا زادة كيفاش عصيدة الزقوقو تجي في حكارها لاهي جارية لاهي عاقدة وكيف تجي الطنجرة مالحة ترمي فيها كعبة بطاطة باش تشرب الملح وهات من اك اللاوي. وكيف تقعد معاهم ما نستفيد من شيء وزيد يكسرولك راسك بحكايتهم وكان قلت جملة بالسوري يشومولك نهارك (تدلغم بالرومي فاس قام سيدي نبي عربي). اما هذا ما يعنيش الي هوما مايقاسيوش من غزرة المجتمع والعنف اللغوي والمادي وساعة تسمع حكايات يحممو القلب اكثر من الحكايات التجارية متاع الأخوين الشابي. لذا نهارة الي باش المثلين ياخذوا حقوقهم مايزمناش ننساو عزايز الستوت خاطرنا الكل كيف كيف.

انضمو إلينا على فيسبوك 

https://www.facebook.com/lgbttunisiens